Освобождение Борисова от немецко-фашистских захватчиков

У канцы чэрвеня - пачатку ліпеня 1944 г. савецкія войскі ў час правядзення Мінскай наступальнай аперацыі (састаўная частка аперацыі «Баграціён») вызвалілі Барысаў і Барысаўскі раён ад нямецка-фашысцкіх захопнікаў.

28 чэрвеня сваімі перадавымі часцямі войскі 3-га Беларускага фронту выйшлі да ракі Бярэзіна. Фарсіраванне ракі і ўзяцце Барысава, які быў ператвораны фашыстамі ў моцны цэнтр абароны, з'яўляліся важным этапам вызвалення Мінска.

Камандаваў 3-ім Беларускім фронтам генерал арміі Герой Савецкага Саюза І.Д. Чарняхоўскі, членам Ваеннага савета фронту быў генерал В.Е. Макараў, начальнікам штаба фронту - генерал А.П. Пакроўскі. Маршал Савецкага Саюза А.М. Васілеўскі ад імя Стаўкі Вярхоўнага Галоўнакамандуючага каардынаваў дзеянні 3-га Беларускага фронту з дзеяннямі 1-га Прыбалтыйскага фронту.

Цэнтральную частку раёна і г. Барысаў вызвалялі войскі 1 1-ай гвардзейскай і 31-ай агульнавайсковых армій, а таксама 5-ай гвардзейскай танкавай арміі. Часці 11-ай гвардзейскай арміі займалі 50-кіламетровы фронт ад возера Палік да в. Навасёлкі. Перадавыя атрады 1-ай, 26-ай, 31-ай, 83-яй гвардзейскіх стралковых дывізій, зламаўшы супраціўленне ворага на сваіх участках, з баямі выйшлі да Бярэзіны. Інжынерна-сапёрныя падраздзяленні хутка навялі пераправы.

У 17 гадзін 29 чэрвеня армейскія часці пачалі фарсіраванне ракі. Гітлераўцы ўсімі сіламі імкнуліся сарваць пераправу. Яны паднялі ў паветра каля 100 самалётаў, аднак наша авіяцыя збіла 22 самалёты і не прапусціла іх да пераправы. Многія палкі позна вечарам былі ўжо поўнасцю на заходнім беразе і працягвалі наступленне. Часці 16-га гвардзейскага стралковага корпуса фарсіравалі раку Гайна і к 2 гадзінам 1 ліпеня авалодалі моцным апорным пунктам - в. Ляхаўка.